مصر طالعة الجمعة عن بكرة أبيها
لاجل ماتعلى وتحلى ونعلى بيها
أوعى تتآخر معادنا ف كل حارة
مصري يعني مُصِّر
والإصرار جسارة
…مصر يعني مصير
ومن تونس بشارة
خد معاك أختك واخوك وأبوك وجارك
مصر مش عزبة أبوهم
مصر دارك…
البادي اظلم ياغجر
والدم مش رايح هدر
وكل نقطة حتبقي سيل
تسقيكوا مر ونار وويل
ياتفوقوا تبقوا ف صفنا
…ياتبعدوا عن وشنا
اللي ضربنا ف بعضنا
بيغشكوا ويغشنا
واما حتولع راح يطير
وينام في جدة علي الحرير
واحنا ف عذاب
مش راح تعيش عمرك آجير
تحرس كلاب
مصر صاحية وقايمة تتعايق بناسها
ثورة قايمة وحالفة لتدوس اللي داسها
اللي ياما ذلها وهانها وحبسها
واللي عاش تلاتين سنة كاتم نفسها
ثورة قامت مش حترجع
…إلا لما الفجر يطلع
….
ع اللي صَدَر قمحها وفاتها جعانة
واللي لطخ إسمها بفقر ومهانة
ثورة قادرة ومش جبانة
كل لحظة تزيد وتولع