يااللي تسسولف اقطع الهرج لآهنت
ماتدري أن قلبي بحكيك قتلته ؟

الصدر ضايق وأنت بيديك لامست
جرحٍ في صدري من زمن قد كتمته

ياخوي أسمع .. طالبك ألزم الصمت
وأسمع معاناتي مع من عشقته

عقب الغياب اللي ذبحني تواجهت
مع سبة أحزاني ورحت وسألته !!

ياهيه وينك .. ليه عقب الوفا خنت؟
وش جاك منه ليه رحت وهجرته ؟

وش فيك عقب اللي مضالك تغيرت؟
عقب الوفا تغدر خفوقٍ سكنته !!

من أول عايشٍ بقلبي ولاهنت
واليوم قلبي عقب فعلتك هنته !!

كذا تجازي صاحبك ماتعلمت ؟
أنك بتعرف قيمة اللي فقدته !

أنا أشهد أني عقب صدك تأكدت
أن الوفا مفقود في وقت عشته

ماني مطول .. داري أنك توهقت
بروح أجمْع قلبي اللي نثرته

يعني تسولف ويوم شرفت دنقت !
دنيا غريبه حتى زولي كرهته !

طيب بسيطه بس طالبك لارحت
أذكر خفوقٍ أنصفك ما نصفته

وقررت أنا امشي والحزن صاح ياوقت
أسمح لي أرحل مع خفوقٍ ظلمته

وضميت حزني وصحت ياوقت .. أعلنت
أن الحزن أوفى حبيبٍ عرفته

ومرت ثمان شهور ويومك تكلمت
ذكرتني بأني مع الحزن خنته !

والله بأني كل ذا الوقت ما نمت
الا ودمعي فوق خدي ذرفته

يا خوي بسكت .. ليتني ما تكلمت
جددت جرحٍ من زمن قد كتمته !!